Fundashon Vishon Banda Bou (VIBA) ta un organisashon dediká na promové i desaroyá e komunidat di Bándabou dor di evento kultural i sosial. Ku un pashon grandi pa nos kultura i tradishonnan, VIBA ta pone su mes na liderato pa organisá i duna forma na Karnaval di Bándabou 2025-2027, despues di a gana e destaho públiko di Gobièrnu di Kòrsou.

E fundashon ta traha riba inklushon di profeshonalnan i lidernan di Bándabou, pa kreá un eksperensia karnavalesko di kalidat ku ta reflehá e identidad vibrante di nos komunidat. Pa realisá esaki, VIBA a instala “Task Force Karnaval Bándabou“, un ekipo di liderasgo ku eksperensia organisatorio i un bista klá riba e futuro di Karnaval di Bándabou.

Nos meta prinsipal ta:

1. Kreá un temporada di karnaval kreativo ku aspektu inovativo.

2. Stimula participashon ku por lo menos 5 grupo nobo di Banda Bou.

3. Marka un komienso nobo i di speransa pa Karnaval di Banda Bou.

VIBA ta traha man na man ku organisashonnan lokál manera “Kòrsou den Pabou”, AGKK, Beehives i lidernan di bario, pa garantisá kontinuidat i un nivel haltu di nos tradishon karnavalesko.

Nos ta invitá tur komersiante i boluntario di Bándabou pa uni ku nos i duna kontribushon pa logra un Karnaval eksitoso. Nos ta kere firmemente den e forsa di komunidat i ta konfia ku huntu nos por halsa nos Karnaval na un nivel mas haltu.